မိုင်တိုင်နှစ်ဆယ်

 

ချစ်ရပါသော မောင်နှမများကို အိန်ဂျယ့်၏ ဝှက်ဖဲလေးတစ်ချပ်ဖြင့် မိတ်ဆက် ပေးပရစေရှင်။ အဲ့ဒီ ဝှက်ဖဲလေးကို အကို(ကိုကိုမောင် (ပန်းရနံ့)) ပြောသလို ဂျော်ကာဖဲချပ်လေး ဖြစ်ဖို့လည်း မျှော်လင့်မိပါတယ်လို့…. :)  :)

 

၂၀၁၂ ခုနှစ် စက်တင်ဘာလမှ အစပြုပြီး အမှတ်တရ အဖြစ် မဝင့်မရဲ မျှော်လင့်မိသော အိပ်မက်လေးတစ်ခုကို အကောင်အထည် ပုံဖော်ကြည့်ရန် အတွက် မရဲတရဲလေး ဆုပ်ကိုင်မိသော မျှော်လင့်ချက်လေး တစ်ခုဖြင့် လမ်းတစ်ခုကို စမ်းလျှောက်ဖြစ်ခဲ့သည်။ အိန်ဂျယ့် ဘဝမှာ စိတ်လှုပ်ရှား စရာ အကောင်းဆုံး အချိန် တစ်ခု ဖြစ်ခဲ့သလို မြေစမ်း ခရမ်းပျိုးရသလို စိုးရိမ်စိတ်ကလေး သဲ့သဲ့ဖြင့် စောင့်မျှော်နေရသော ကာလတစ်ခုအဖြစ်  ညတာ အလွန် ရှည်လျား လွန်းလှသော ဆောင်းညများလည်း ဖြစ်ခဲ့သည်။

ရည်ရွယ်သော ဆန္ဒတစ်ခုကို အကောင်ထည်ဖော်ဖို့ စာရေးသူ မောင်နှမ တစ်တွေနှင့် တိုင်ပင်ကြည့် သောအခါမှာ မယုံနိုင် လောက်အောင် အားပေးမှုတွေ ရရှိခဲ့ရသည်။ “ ယုံကြည်မှု ရှိရင် ကြိုးစားရမယ်၊ ကြိုးစားသူ အတွက် ထိုက်တန်တဲ့ တုန့်ပြန်မှုဆိုတာ ရှိကို ရှိနေတယ်” ဟူ၍ နောက်ထပ် တစ်ကြိမ် မကြားနိုင်တော့ ပြီဖြစ်သော ကွယ်လွန်သွားပြီ ဖြစ်တဲ့ ဖခင်ဖြစ်သူ၏ စကားတစ်ခွန်းဟာ အိန်ဂျယ့်ကို အားဖြစ်စေခဲ့သည်။ ဖြစ်မှဖြစ်ပါ့မလား ဆိုသော စိုးရိမ်စိတ်လေးဖြင့် ပျိုးမိသော  အပင်ငယ်လေးအတွက် ပူပင်သောကတွေလည်း  ဖြစ်ခဲ့ရသည်။

ချစ်စရာ ကောင်းသော ကုသိုလ်လေး တစ်ခုက လိုအပ်သော အကူညီ မှန်သမျှကို စိတ်အား၊ လူအားဖြင့်  ဝိုင်းဝန်း ကူညီ အားဖြည့် ပေးကြသော မောင်နှမ တစ်တွေ ရှိနေခြင်းပဲ ဖြစ်သည်။ အိန်ဂျယ်ကို မည့်သို့ မည်ပုံ လုပ်ကိုင်ရန် အကြံဥာဏ် ဝိုင်းပေးကြသလို၊ လိုအပ်သော အကူအညီတွေကိုလည်း အားတက်သရော ကူညီ ပံ့ပိုးပေးခဲ့ကြပါတယ်။ မမ   မလေး (အိမ့်ချမ်းမြေ့)၊ ကိုရန်အောင်၊ အကို  မြစ်ကျိုးအင်း၊ မမ မြသွေးနီ၊ ကိုဗညား (လင်းခတ်ဒီနို)၊ ညီမလေး ဂျွန်မိုး စသော မောင်နှမများ၏ တစ်ဦးချင်း၏ အကူညီ ၊ အားပေးမှု၊ အကြံပေးချက် တွေနှင့်အတူ အိန်ဂျယ်၏ အိပ်မက်လေးကို ရဲရဲဝံ့ဝံ့ အကောင်ထည် ဖော်ဖြစ်ခဲ့ပါသည်။

အမိမြေ၏ အဝေးမှာ ရောက်ရှိနေသော အိန်ဂျယ့်အတွက်  စိတ်ပဲရှိပြီး ကိုယ်တိုင်ကိုယ်ကျ မလုပ်ကိုင် နိုင်တာကြောင့် ကိုယ်စားလှယ် တစ်ဦးအဖြစ် အစစအရာရာ အိန်ဂျယ် လိုအပ်သည့် အကူညီများကို တာဝန်ယူပေးခဲ့ သူကတော့ မမ ပန်းအိ(ဘလော့ဂါ ထရီဆာ) ပဲ ဖြစ်ပါသည်။ စိတ်အားလူအားဖြင့် အင်တိုက်အားတိုက် ကြိုးစားပေးသော AMK Creation မှ အကို ကိုမော်ကြီး (ကိုကျော်အောင်မော်)နှင့် ချစ်ဇနီး မမမြသွေးနီ တို့အား အထူးပင် ကျေးဇူး တင်ရှိပါသည်။

အခုဆိုရင် အိန်ဂျယ့်ကိုယ်တိုင် စီစဉ် ထုတ်ဝေသော စာရေးသူ ဘလော့ဂါ အယောက်(၂၀) ပါဝင်ရေးသား ထားကြသော မိုင်တိုင်နှစ်ဆယ် (ရသဝထ္ထုတိုများ) အမည်ရှိသော စာအုပ်လေးကတော့ မကြာခင် အချိန်အတွင်းမှာ ထွက်ရှိလာတော့မှာ ဖြစ်ပါတယ်။ အနုပညာ ပန်းများ ခြံရံထားသော ၊ စာရေးသူ မောင်နှမများ၏ နှလုံးသား ပဲ့တင်သံများ နှင့်အတူ ဘဝရသ အစစ်များ ခံစားကြ ရမည်ဟု ယုံကြည်မိပါတယ်။ 

ထို့အပြင် မြန်မာ့ စာပေလောကမှ လေးစားရပါသော  စာရေးဆရာများ ဖြစ်ကြသော ဆရာ ချစ်စံဝင်းနှင့် ဆရာကောင်းသန့် တို့မှ အမှာစာများဖြင့် မိုင်တိုင်နှစ်ဆယ်ရဲ့ စာရေးသူ ကလောင်သစ်များ၏ လက်ရာများကို စေတနာရှေ့ထား မေတ္တာတရားတို့ဖြင့် သုံးသပ် မွမ်းမံပေးထားကြပါသည်။

စာရေးသူများ၏ စာမူများနှင့် လိုက်ဖက်လှစွာသော အတွင်း သရုပ်ဖော် ပန်းချီပုံများနှင့် တကွ စာရေးသူများ၏ ရင်တွင်းစကားတစ်ချို့ကိုလည်း ကောက်နှုတ် ဖော်ပြပေးထားပါသည်။ ဘဝရသကို အခြေခံ ရေးသားထားကြသော ဝထ္ထုတိုများကို စုပေါင်းထားခြင်း ဖြစ်သည့်အတွက် မိုင်တိုင်နှစ်ဆယ် ဝထ္ထုတိုလေးမှ စာဖတ်သူ မိဘ၊ပြည်သူများသို့ နှစ်လိုဖွယ် တစ်စုံတစ်ရာကို ပေးစွမ်းခံစားနိုင်လိမ့်မည်ဟုလည်း ယုံကြည်မိပါသည်။

အိန်ဂျယ်နှင့် အတူ ပါဝင်ရေးသားကြသော စာရေးသူ ဘလော့ဂါ မောင်နှမများ အားလုံးလည်း ထပ်တူ၊ထပ်မျှ ပျော်ရွင်ကြမည်ဟု ယုံကြည်မိပါသည်။ အိန်ဂျယ်နှင့်အတူ ချစ်စွာသော မောင်နှမများ၏ မိုင်တိုင်လေးများ အထင်အရှား ကဗ္ဗည်းတွင်ဖို့ရန် အတွက် စာဖတ်သူ ပရိသတ်များ၏ အားပေးမှုများကို မျှော်လင့်စောင့်စားရင်း..

အိန်ဂျယ်လှိုင် ထုတ်ဝေ၍ AMK Creation မှ စီစဉ်သော

မိုင်တိုင်နှစ်ဆယ်

( အွန်လိုင်းရသ ဝထ္ထုတိုများ )

Tuesday ,  January  22, 2013 ရက်  တွင် ထွက်ရှိမည် ဖြစ်ပြီး ဖြန့်ချီရေး အနေဖြင့် စာပေလောကမှ တာဝန်ယူ ဖြန့်ချီမည်ဖြစ်ကြောင်း သတင်းကောင်းပါးလိုက်ရပါသည်။ ဖြန့်ဖြူးရေးအနေဖြင့် အဓိကအားဖြင့် ရန်ကုန်(Ocean ၊ Lion City, Taw Win, Asia Light စသည့် စီးတီးမာတ်များ အပါအဝင် ) မန္တလေး၊ တောင်ကြီး၊ မော်လမြိုင်၊ နေပြည်တော်များကို တာဝန်ယူ ဖြန့်ချီပေးမှာ ဖြစ်ပါသည်။ ဝယ်ယူရရှိနိုင်မည့် ဆိုင်များကို ထပ်မံ အသိပေး အကြောင်းကြားမည် ဖြစ်ပါကြောင်း သတင်းကောင်းပါးရင်း အိန်ဂျယ်တို့ရဲ့ မိုင်တိုင်နှစ်ဆယ် ကို အားပေးကြပါဦးလို့ ... :)

အွန်လိုင်းရသ စာပေမှ ပုံနှိပ်မိဒီယာကို ကူးပြောင်းတဲ့ ပေါင်းကူး တံတားလေး တစ်စင်းအဖြစ် ဖန်တီးခွင့် ရတဲ့အတွက်လည်း အတိုင်းမသိ ဝမ်းသာမိပါသည်။

လေးစားစွာဖြင့်

အိန်ဂျယ်လှိုင်

**********

******

****

Monday, January 21, 2013

Austria 1;38 (PM)

Posted in: ရင်တွင်းစကား,အမှတ်တရ